張繼聰今日在數碼港出席親子活動，同超過250位父母同子女進行「吻手日」，創造健力士世界紀錄。

阿聰今日雖然單拖現身活動，但佢話收工後就會趕返屋企，三代同堂慶祝父親節。阿聰話自己唔介意父親節要開工，仲笑笑口話：「父親節有工開係一種幸福，如果父親節只係陪個仔，對個仔前途都唔多好啦。」

阿聰提到囝囝噚日11歲生日，招待咗10位小朋友在家中玩樂，齊齊過夜訓廳，阿聰話：「見佢哋睇世界盃傾偈，好麻甩佬嘅縮影，差在未有花生同啤酒，我都好百感交雜，噚日阿仔生日全程同我講唔夠5句說話，呢個就係人生，原來世界有報應！自己年幼時都覺得父母阻住晒，鍾意生日搵朋友過，可能過兩年個仔會踢我出門口。o依家明白做父親嘅偉大，自己都好孝順父母，大家要把握時機孝順。」

至於阿仔有冇咩父親節驚喜？阿聰話：「舊年佢喺屋企搵咗把風扇送俾我，都期待佢今年又有乜驚喜，雖然誠意不足，但都幾有創意。」至於前世情人阿囡Kaka Ball就送個香吻俾爸爸，令阿聰好窩心，阿聰只望兒女生性做人，冇太大期望。

精選娛聞，喺晒《娛果》
http://fb.com/appledailyent