女人揀車口味往往跟一班男人天南地北，她們揀選七人車的先決條件又係乜呢？大家沒有估錯，她們對性能的確是冇乜要求，只求唔好咁大架車，操控容易泊位就得。以下三位媽媽不約而同，都是喜歡七人車尾箱夠大，放嘢夠多，她們最緊張往往只是一班寶貝大帝。

Jess（牌齡：10年 真牌齡：3年）
現役車：豐田Noah
兩個小朋友，分別是Jacob及Bernice，每日都會駕車去買菜及接送他們返學放學。
「始終我有兩個小朋友，快是相當重要的，所說是上車快，因為我之前是駕駛一般私家車款，上車花很多時間，電趟門及車身夠低比較方便，上車快比較安全，我又毋須俯身幫他們扣安全帶。第二就是車廂有電視，我每日都是長途車，有個電視播卡通片，少好多爭執，而我又可以好安靜地駕車。」

Joyce（牌齡：17年 真牌齡：3年）
現役車：本田Freed
有一名女兒叫Hilda，不過由於老公無車牌，所以每日都會駕車接送女兒上學及丈夫上班。
「負擔得起，媽媽們有一架車代步方便好多，因為的士有時好難call，而且小朋友多雜物，每次出街都唔使咁辛苦。油耗低也相當重要，毋須不停入油也比較經濟划算。Freed最大好處是低油耗，每次入滿油也只需約$500，而且車價相宜。其次是車身細細又slim，有時要載女兒去學游水需要泊街邊S位，也不會太難泊位。另一個好處是自己一個人或兩夫妻外出，揸Freed的感覺不會太像司機。」

Kitty（牌齡：7年 真牌齡：1年半）
現役車：日產Serena
有三個小朋友，一個大女及一對孖仔，左是天天，右是藍藍，每朝都會送三個小朋友去兩間不同的學校上課。
「我覺得車廂一定要夠寬敞，還要適合放兒童座椅，他們可以坐得舒服一點。高峯時期可容納3張大型兒童座椅，同時亦可載到人，所以Serena容量也算大。雖然它的尾箱不算太寬敞，但可以放得下一部孖仔手推車、兩部滑板車及一大堆野餐用品。而且Serena的力量也不俗，我們經常負重咁大，上斜路都唔會覺得它唔夠力。」

總括三位媽媽的意見，一家人揀七人車都是視乎家庭需要，例如會否經常坐七人、老公會否一齊揸、揸幾年會否換車等因素。

記者：許維雅
攝影：潘志恆、蕭志南、張志孟

2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily