「內有惡犬」就成日見，但東涌散頭村就啱啱掉轉係「外有惡犬」。事源一個村民養咗5、6隻大型狗，但冇管教放任狗隻周圍走，結果唔少村民或行山客都被咬傷。村長話過去一年因被狗咬而報案嘅個案最少4宗，令村民困擾，出入擔驚受怕。村長指曾報警及向漁護署備案，但相關部門推缷責任，未有盡力協助解決問題，令狗主夫婦能繼續作惡。

住喺惡狗狗主隔籬嘅鄭先生講，惡狗由同姓鄭嘅夫妻飼養，平時放養啲狗喺村內走嚟走去，所以見人就咬，自己亦曾被咬傷。鄭先生話曾多次報警，但警方轉介到漁護署後，因為私人地方無權進入而不了了之。

惡狗有幾惡？就係呀sir見到都嚇到即刻掉頭走，話說上星期五，兩位警員同兩位消防員去查縱火，但未到案發現場已被惡狗「招呼」。最少4隻狗衝向呀sir，來勢洶洶，嚇到呀sir走夾唔唞，仲不時回頭望，要睇清形勢。最終有村民持棍嚇退惡狗，呀sir先至查到案。

惡狗見人就咬，鄭先生指後來有幾隻狗被人毒死，狗主仲拎刀找人晦氣，劈爛兩部單車，懷疑狗主有報復心態，指曾聽過狗主講「特登養啲狗咬人」。佢話已經求助無門，冇應對方法，「只係想佢困好嘅狗」，而家出入只能拎住支棍自保。

據了解，狗主夫婦無業，兩人原本居住喺市區公屋，但後來公屋被收回，大約3、4年前搬返村內，住喺老竇留落嚟嘅牛棚，初初養狗時只得一、兩隻，但後來有狗生咗，又收養其他狗，最高峰時養咗14隻，目前仍然養緊5、6隻狗，包括唐狗及洛威拿等。

村長鄭先生指如果村民一個人出入，惡狗就會群起撲埋嚟，甚至咬人，亦試過有個別行人客唔知情誤闖入嚟，結果被惡狗咬傷。由於惡狗影響其他人安全，鄭村長話正式約見過兩次狗主夫婦到村公所傾，對方見面時承諾會好好看管啲狗，但轉個頭就當無件事，亦有同姓兄弟好言相勸過狗主，但都冇作用。

鄭村長話，曾向東涌警署指揮官投訴，又寫信向漁護署長反映，但對方都表現得愛莫能助，「（有關部門）未有盡力協助解決問題，甚至推缷責任，有cctv都話辨認唔到邊隻狗咬人！」鄭村長邊講邊呻，「感覺冇佢符，佢哋搬入嚟對上10年（條村）好太平」，話循正常途徑可以做嘅已經做哂，現在只能寄望政府執法。