有「玩具大王」之稱嘅蔡志明，佢大女蔡加敏前日同東華前主席馬鴻銘結婚，紅娘黎姿都有嚟恭賀，夜晚男家同親友喺沙田賽馬會會所食飯，不過蔡加敏同馬鴻銘行完禮後，先返去蔡家休息，然後再去食飯。6點鐘左右，蔡志明同囡囡蔡加怡、囝囝蔡加讚等先後到場，佢哋換上一身便服，蔡志明話：「今晚係馬生請啲親戚食吓飯，十圍八圍左右啦。」有冇特別儀式？佢話：「冇乜，食餐飯啫。」

擺168席破紀錄

一對新人冇喺正門出入，亦都冇接受訪問。梗係啦，聽日先係「東華情緣」嘅重頭戲──蔡加敏同馬鴻銘嘅結婚喜宴，仲會長達16小時㖭，梗係要唞足精神啦。新郎聽朝8點，就會由九龍塘出車，直踩女家位於沙田九肚山嘅大宅接新娘，做傳統嘅斟茶儀式。到咗中午，佢哋就返男家搞三朝回門嘅嘢；之後兩三點，一對新人就要殺落會展，準備3點開始有親朋長輩嚟打牌耍樂。
今次一對新人筵開168席，打破咗灣仔會展一晚最多酒席嘅紀錄，佢哋以王子與公主做主題，佈置公司已經開始喺會展GrandHall門口，用大量水晶搭建巨型城堡，晚宴除咗有雙方父母上台致辭，蔡加敏媽咪蔡李蕙莉仲會唱歌。喜宴預計凌晨12點散席，婚禮計計埋埋搞足16個鐘。