係呀,又係吳若希!
吳若希今日喺灣仔DBC數碼電台宣傳新碟《眼淚的秘密》,問到好朋友蔡思貝被指係發電機、姣電洪永城嘅報道,佢話:「劇集宣傳啫,我都係發電機啦,我都唔差0架,唔怪得我哋係friend。」不過報道話洪永城同蔡思貝去BBQ嗰陣,好照顧對方喎,吳若希笑言應該係劇集情節:「我哋都成日話約叔一齊拍劇嘅人去BBQ,《實習天使》冇BBQending嘛,咪喺現實中BBQ囉。」咁有冇見過蔡思貝男友麥秋成?佢即刻大笑話唔知:「我冇見過佢哋一齊,可以喺電視城有見過麥秋成嘅。」
好啦,話返隻碟。
吳若希話依家出碟好難,所以有碟出應該好感恩,仲話新碟有11首歌,好多都係劇集歌,所以大家都應該好熟悉:「我反而想宣傳多啲自己作曲同填詞嘅《捨得分手》,首歌係我沖涼嗰陣諗嘅,份詞就係我睇完佛謁之後寫。」
咁呢首《捨得分手》係唔係你心聲先?吳若希話:「總之係經過咗啦。」唔通係指去年被揭啜爆嘅莊士國際太子莊家彬——個表哥蕭立莊?嗰陣有傳因為男友家人反對,棒打鴛鴦,最後兩人分手喎……但吳若希點都唔肯講,只係承認係自己嘅愛情故事。
不過吳若希嘅緋聞表咁多人,既然蕭立莊已成過去,咁啲Uncle呢?佢就笑謂:「睇下佢哋買唔買囉,不過Uncle又點可以四後輩嘅碟呢?應該係我送畀佢哋,呢個係禮貌同尊重。」咁你預幾多隻碟送畀Unclesss先?佢就話有問佢攞就畀喎,仲話會買返50隻碟送畀屋企人同提攜過佢嘅前輩添。