多次貼中港股走勢嘅「龜仙人」陸東，以前做分析員，出親報告封面都放張烏龜相做插圖；佢冇曝光一段時間後，噚日推出處男作兼搞新書發佈會。不過本書封面冇用烏龜相，發佈會上亦唔見小寵物縱影，但都夠晒撐，因為粉絲加埋傳媒，已經逼爆個場。
做嘉賓主持嘅《信報》前專欄作家原復生──即係轉去精電（710）做CEO嘅蔡東豪，都忍唔住笑佢：「冇嘢做冇title，出書都咁有吸引力。」

預言港幣10年內消失

吸引力有幾勁？有女粉絲爭住攝位，只係想同佢合照。另外有位大叔坐頭位，全程用手機拍低，仲問陸東點預測07年股災。陸東即時更正話：「我冇（預測），只係分析。」
冇見一排嘅陸東，喺發佈會上依舊句句驚人，佢坦言：「港股直通車行得通都冇用，對香港效應好微」。又預計「10年內人民幣自由兌換，到時港幣將會消失」，不過如果因為咁，就以為中國將會成為第一強國嘅話，就未有咁快，「我有生之年都睇唔到」。
對今年樓市雖然睇得淡，但佢就計過數，覺得太古城兩年後可以升到一萬蚊呎，仲申報自己冇貨喺手。回應粉絲問電訊股，佢就話：「電訊業只係高利潤嘅公共事業，唔會令你賺大錢，和記賣橙嘅事唔會再發生。」
咁書又寫完，自立門戶搞基金檔嘢又未出，陸東笑言呢排「hea得好舒服，一個禮拜有一兩日行山釣魚，陪3隻狗玩。」至於佢個基金，就會喺三四月至推出，入場費10萬美金。

李華華
mailto:[email protected]