有韓劇「收視女王」之稱嘅女星孔孝真，之前同女星嚴智苑合作嘅韓片《Missing:消失的女人》將於下周三喺韓國正式公映，前日就率先舉行VIP試映會，雖然孔孝真日前受訪時講明想同劉亞仁合作，又邀請對方去試映會，不過劉亞仁前日最終都冇現身，但依然有唔少人去撐場，除咗之前一齊演出韓劇《嫉妒的化身》嘅徐智慧、朴煥熙同朴真珠，更有其圈中好友宋允兒、李敏貞、孫藝珍等人！

而孫藝珍噚日就喺Instagram晒合照兼幫電影宣傳，相中包括李敏貞、宋允兒、孔孝真、嚴智苑及吳允兒等人，一眾女演員望住鏡頭微笑，相當養眼。呢張咁難得嘅合照當然吸引唔少粉絲留言：「果然靚女身邊嘅都係靚女」、「女神大合集」等，又有粉絲貼心地話天氣越嚟越凍，提醒女神要着多件衫。