經濟阿sir教落，GDP等如私人消費（C）+私人投資（I）+政府開支（G）+淨出口（Export-Import）。中美糾紛帶來嘅經濟禍害，以至雙方撐住經濟嘅方式，都可以用呢條簡單方程式去拆解。

華為、中興事件過後，中國大抵無人再敢投資美國。美國投資中國亦受阻，微軟創辦人Bill Gates上個月發出2018年結信，其中一個重點係發展核能，Bill Gates本來打算同中國合作，喺月頭被叫停了。

呢類投資禁令使中美GDP嘅I部份受創，即使喺呢個地球，投資中國嘅替代品相當有限，Bill Gates投資核能已屬一例。特朗普何解唔畀聯儲局加息？原因係加息會discount資產回報，令資金投資資產嘅誘因進一步減低。如果發動貿戰、禁投資、又加息，I會急速下滑，少咗I代表少咗生意，亦失去咗增加企業回報能力，長遠加人工都少啲，C亦跟隨下跌，少咗稅收，G亦受影響，形成惡性循環。貿戰當然同時削減淨出口，即係中美全方位消耗大家GDP。

於是中美同時減稅，中國更放水試圖阻止惡性循環，亦透過財政政策增加G。G嘅投資效率永遠都及唔上I，少私人投資，長遠經濟好難好。中美糾紛已經玩得夠大，未要脅到中國之前，美國只係暫停加息係完全唔夠，無論貨幣政策定財政政策都要加注先頂得住。

最近大陸回購利率跌至近年低位，有講法話因為游資太多，形成有錢冇人借，扭轉過去借錢難嘅情況。一日CNH未企穩，錢就不能南下。稍後要睇美滙會否弱勢，若人幣南下大門得以重開，先可以令市場短暫興奮。

晉佳

https://www.facebook.com/advanceguy1