早前提過國泰航空（293）有位空姐歌后韋瑪莉茵（Mariam Razviz），原來佢早有歌星夢，曾參加新秀歌唱大賽，雖然唔入圍，但後來喺國泰參加歌唱比賽，一償心願兩度贏得冠軍，佢都自覺唱歌好有杜麗莎feel，希望有機會跟對方合唱一曲。
Mariam噚日喺國泰城演講廳向傳媒分享唱歌心得，又即席演唱張學友《愛是永恒》同埋Whitney Houston《Greatest love of all》，表現拍得住專業歌手。

自爆兩度參加新秀比賽

Mariam唔肯透露年齡，但自爆未考空姐前，試過兩度參加新秀歌唱大賽，可惜當時喺初賽已經俾人叮走。
佢2002年就加入國泰做空姐，2005年以玩票性質陪朋友參加公司歌唱比賽，點知贏埋冠軍，事隔10年，今年參賽再奪冠。Mariam笑言，𠵱家多咗同事注意佢，又講笑話要做佢粉絲，收工要約埋去唱K咁話。
Mariam自小鍾意唱歌，冇正式跟師傅學唱歌，只係中小學加入過合唱團。
Mariam贏得同事掌聲與友誼，仲學識護聲秘訣。無辣不歡嘅Mariam話自己冇戒口，但最緊要睡眠充足，否則易聲沙；另外仲要多飲水同食川貝枇杷膏。平日唔使飛，佢就跟國泰女子足球隊踢波練氣，佢係負責守龍門，講笑話自己「件頭夠大」。

李華華
mailto:[email protected]