【有料到】100秒射中15格 南野拓實日本節目顯射術
蘋果日報 2019/12/23 00:01
利物浦南野拓實
啱啱成為利物浦新兵嘅日本前鋒南野拓實，相信唔少球迷都喺歐聯睇過佢嘅表現。近日網上就留傳呢位日本球員喺過去參加日本綜藝節目嘅短片，南野拓實喺節目上邊參加射門挑戰，仲成功喺限時100秒之內射中晒15個目標。
過去有唔少世界球星都試過喺日本節目入邊挑戰射九宮格，之但係今次南野拓實嘅射法就有啲唔同。首先，平時大家睇開係類似射十二碼，將個波放喺地下再射。但係今次南野拓實係用窩利式射法，去射中晒15個目標，就連佢嘅國家隊隊友吉田麻也，喺100秒入邊都只可以射到13個，所以呢個挑戰認真見到南野拓實嘅腳法係幾勁。
除咗南野拓實同吉田麻也之外，巴黎聖日耳門前鋒基利安麥巴比都受邀過去參加呢個挑戰，不過呢位法國前鋒100秒都只係可能射到14個。
南野拓實只係用96秒就射晒15格。
就連麥巴比都做唔到100秒射15格。
效力修咸頓嘅吉田麻也成績更差，射得13格。