賴慰玲（Winki）早幾日穿羊水入院，好姊妹陳凱琳就率先喺ig貼相，篤爆原來賴慰玲囝囝Marat已經出咗世。賴慰玲之後又貼咗啲相，見到陳凱琳、鄭嘉穎同Marat好似一家三口咁幸福。

陳凱琳、陳豪、森美今日就喺銅鑼灣出席服裝店開幕禮，講到陳凱琳做咗契媽，佢再爆料：「其實生咗5，6日，噚日先去探BB。」當時賴慰玲老公仲問佢，要唔要抱BB，陳凱琳就話見到BB好開心：「我當時好興奮，第一個抱，好輕，得6磅幾。」

講番張「全家福」照，嘉穎一副慈父樣，陳凱琳就反問：「係囉，係咪已經當係？」佢又話嘉穎初初唔敢抱，要到坐低先敢，之後睇番都覺得好sweet。講到嘉穎副冧樣，陳凱琳話：「佢好鍾意小朋友，o依家滿足到佢，第一次做契爺。」而佢同嘉穎嘅造人大計，陳凱琳就話要一步一步啦。

賴慰玲痛咗36小時，最終要剖腹生產，陳凱琳又爆料：「好好笑，佢穿咗羊水，都要食完麵先入院。」不過賴慰玲原本都有心理準備喺嗰幾日生，只係冇諗過入院後都要花咁長時間，陳凱琳感受到母愛偉大。

至於搶先報喜，陳凱琳話冇人鬧佢：「冇，其實我都有問過佢嘅，好多人都想睇相，咁咪由我做代表放上網。」陳凱琳又指冇上契儀式。

更多娛聞，喺晒《娛果》
http://fb.com/appledailyent