韓國人氣男團防彈少年團(BTS)正舉行世界巡迴演唱會《2018 BTS LOVE YOURSELF WORLD TOUR》，BTS前日搭專機抵台，噚晚進行首日演出，係組合第4次喺台灣開騷，不過就係首次喺桃園國際棒球場進行演唱會。開騷前，BTS率先進行綵排，更與幸運入場睇綵排嘅粉絲互動，大派粉絲福利。

BTS先以《IDOL》打頭陣炒熱氣氛，加上絢麗嘅煙火效果，入場嘅2.5萬名粉絲尖叫聲不斷，由於係室外場地，場外都有近千買唔到飛入場嘅粉絲圍觀。BTS相隔一年再到台灣開騷，7子都相當識做用普通話冧粉絲，Jimin更表示：「台灣的ARMY(粉絲名稱)想你們了！」，V又賣萌做出心臟跳動嘅動作，晒普通話說：「噗通噗通！」，相當搞鬼。柾國亦賣口乖地表示：「今年有好多幸福嘅事，都係ARMY創造出嚟。」又用普通話講「愛你們」冧爆粉絲，至於Suga就表示想每年嘅開始及結束都同粉絲一齊。

除咗演出新歌，BTS又勁歌熱舞《RUN》、《I NEED U》、《DNA》等人氣歌曲，之後7位成員又輪流回眸一笑，電暈粉絲。雖然是次演唱會冇翻譯，但7子都落力用普通話同粉絲互動：「真的準備好了嗎？」、「尖叫聲！」、「不夠不夠」，相當用心。BTS之後獻唱《DOPE》、《血汗淚》(Blood Sweat & Tears)等Remix版本組曲，再掀演唱會高潮。

BTS又各自準備咗solo舞台展現不同魅力，更為台迷送上驚喜，透過中央控制系統令後方看台座位顯現出「TAOYUAN」（桃園）字，令粉絲相當感動。安哥時，Suga預告會再訪台開騷，柾國亦感慨地表示：「呢一刻感覺好完美，好似想落雨，但又冇落，夜晚嘅天空睇得好清楚，吹住涼風，仲有你哋喺度，感覺特別享受，希望你們都得到力量。」隊長RM亦表示：「我哋好似每年都嚟台灣一次，台灣就好似我哋屋企咁。」又用普通話說道：「明年會再回來的，今天真的很幸福，我愛你。謝謝給我們很好的回憶。」

精選韓流，喺晒《娛果》
http://fb.com/appledailyent