今晚冇咗英超聯，電視台只直播一場意甲一場西甲，中間夾住兩場錄播意甲波。對於唔賭波嘅球迷嚟講，會係一個幾好安排；至於鍾意玩番多少嘅波友，就要小心意甲波啲戰果會有暗湧嘞。
首先就有米蘭雙雄喺歐冠盃決戰在即，隨時有揸流攤嘅可能啦；其次祖記情況差唔多，而且佢哋幾乎篤定冠軍，讓到佩魯賈一球/球半都咪話唔驚；最後就梗係意甲球隊拉馬因素啦。上個禮拜佩魯賈對布雷西亞，及摩德納對安玻里兩場，和局賠率熱到爆燈嘅賽事，結果兩場真係開和局，四隊各得一分齊齊開心，只苦了一班亞洲盤莊家唔知點開盤好。今日有場無開盤嘅意甲波，安玻里對阿特蘭大，又係和局熱到只有兩倍嗰隻，你有計嘅話，一於小敲和局啦！

科東尼獲續約笑到咭咭聲
南非中場科東尼喺曼聯雖屬大後備及喺近年成日受傷，但仍獲得三年新約。換轉我求大俠係佢，肯定笑到收唔到聲，事關間中落吓場就個個禮拜袋二萬鎊，呢啲工去邊度搵！曼聯喺南非有間足球學校，而科東尼喺南非亦有支球隊，唔知係咪咁，佢可以喺曼聯踎到○六年！

英傳媒狂轟荷杜踢走老舒
舒寧咸無端端唔獲熱刺續約，喺英國引起好大迴響，無論係英國報章定網頁，大部份都企喺舒寧咸嗰邊，認為係領隊荷杜唔啱；另外英球壇名宿卜比笠臣同埋前熱刺隊長舒活亦話荷杜冇品。所有報章得出嚟嘅結論都話荷杜做球員時代就真係冇得頂，但做領隊就麻麻。