【新增內容】
陳奕迅（Eason）入圍台灣第29屆金曲獎，第三次角逐最佳國語男歌手，對手有同樣爭三度封王嘅林俊傑（JJ）、宋念宇、李玖哲同許書豪。

Eason今年好隆重咁推出咗國語專輯《C'mon in～》，搵嚟Swing嘅陳哲廬（Jerald）製作，更加同ViuTV合作，親身上陣做男主角拍音樂劇《短暫的婚姻》，而Swing嘅另一成員Eric Kwok亦都有參演，劇集推出後口碑亦非常之好。

Eason近7點壓軸行紅毯，以Alfred Dunhill西裝配牛仔褲，點綴Bottega Veneta領呔，仲同盧廣仲抱抱。佢受訪時話：「第三次機會，沒有緊張，因為沒有對戰的感覺。」

Eason又解釋係冇乜點留意新聞，有時總會錯過啲好歌，佢話見到金曲獎提名嘅歌手，都會搵番佢哋啲歌聽。Eason又點名讚王菲女兒竇靖童嘅專輯好聽，但冇見到佢入圍，希望見到佢爭獎。

今晚係台灣第29屆金曲獎頒獎典禮，Eason除咗最佳國語男歌手，佢嘅專輯《C'mon In～》亦獲提名年度專輯獎、最佳國語專輯獎，而佢嘅拍檔Jerald就獲提名最佳專輯製作人獎同最佳編曲人獎，不過可惜最佳編曲人獎輸咗畀台灣嘅溫奕哲，而最佳專輯製作人獎就輸咗畀台灣嘅樂壇大哥李宗盛。

最佳作曲人由台灣歌手盧廣仲獲得，佢一上台就大叫：「Yeah！」佢仲特別多謝喺天上嘅婆婆同麻麻，更用台語大喊：「你個孫攞獎喇！」其後另以台語歌《魚仔》拿下金曲獎年度歌曲。

精選娛聞，喺晒《娛果》
http://fb.com/appledailyent