當年今日
關於我們

敏妮Talk:精明爸爸富小孩 - 溫敏妮

蘋果日報 2008/02/12 00:00


農曆新年前後,銀行都會推出小朋友儲蓄戶口優惠,主要都係吼住小朋友嘅利是錢。不過,趁新春教曉小朋友理財,不失為一個好時機。
敏妮識得一個做會計嘅uncle,佢有對龍鳳胎,好cute,啱啱上幼稚園,所以新年期間去飲茶,一啲唔熟悉嘅茶客都會畀利是佢哋。聽uncle話,龍鳳胎都有自己嘅戶口,幾年嚟各人已經儲到幾萬蚊,uncle準備當龍鳳胎各自儲到10萬蚊嘅時候,就會幫佢哋做投資。
一般小朋友有錢喺身都會要求買玩具,龍鳳胎都係小朋友,點會例外,但係uncle就好有辦法,佢一早就同小朋友開儲蓄戶口,等佢哋知道爸爸媽媽唔會「吞」咗啲利是錢,佢哋有屬於自己嘅財富。不過,咁細個小朋友對財富冇乜概念,所以uncle每次同小朋友出外購物,都唔會碌卡,只會畀現金,而且仲要叫龍鳳胎喺自己個銀包度攞錢找數。
uncle話:「一來可以等佢學吓數學,二來飲茶嘅時候叫佢攞錢找數,跟住去超級市場買嘢又叫佢喺銀包攞錢,到晚飯時找數,佢會發現銀包嘅錢越嚟越少。到食完飯想買玩具,我畀個銀包佢睇,囡囡會話:『爸爸冇錢咯!』」當冇嘅時候就會懂得珍惜,所以唔好睇龍鳳胎咁細個,佢哋已經好識得慳,唔會亂使錢。
為咗加添龍鳳胎儲錢嘅誘因,uncle仲效法政府資助大學嘅方法,就係龍鳳胎儲幾多錢入戶口,佢就額外存入同等數額嘅錢入戶口,龍鳳胎見到自己個戶口,數目倍增,就更加積極儲錢。
積少成多,聚沙成塔,好多家長都希望小朋友能夠自細養成儲錢習慣,不過,好多時連大朋友都受唔住物質誘惑,何況小朋友,作為家長真係要花多啲心思。
網誌: http://wanmanil.com/blogs/