團拜係每一個新年都會做嘅嘢，一班人去拜年係開心嘅，但係有冇諗過，團拜嘅陣容，都可以有最強呢？今日黃心穎就貼咗一張團拜嘅相，呢張相就勁喇，入面嘅陣容簡直係最強團拜陣容！

相入面有咩人呢，個個都係無綫嘅當紅花旦小生，包括有：陳展鵬、黃心穎、胡定欣、陳山聰、田蕊妮、黃宗澤、李施嬅、麥明詩、胡諾言、岑麗香、袁偉豪、羅天宇、張曦雯。咁大班花旦小生，點解會聚埋一齊呢？答案係因為佢哋去樂易玲樂小姐嘅屋企做團拜，真係樂小姐先可以搵到呢個陣容返嚟。

陳山聰就回覆傳媒，話今日去樂小姐屋企食嘢拜年，講到係唔係約埋一齊，陳山聰就話佢哋一齊跑步嘅「Crazyrunner」就係約埋一齊，嗱，胡定欣就係「Crazyrunner」嘅成員之一，但點解又會有陳展鵬出現呢？會唔會係同胡定欣一齊嚟呢？不過陳山聰就回覆傳媒話只係咁啱撞到，嗯...真係好有緣喎！

而「Crazyrunner」一行人之後就去咗胡諾言屋企團拜，胡定欣都有一齊去，不過今次就唔見陳展鵬喇...