馬國明同胡定欣有傳佢哋上年開始地下情，點知最近又話胡定欣經葉翠翠介紹，識咗個內地富豪，又傳胡定欣公主病太勁，搞到俾馬國明飛咗，早排馬國明同唐詩詠夾份請新劇《鐵馬尋橋》演員食飯，點知胡定欣有到，馬國明主人家就唔到。
前晚元秋請《鐵》劇演員去鯉魚門食飯兼一齊睇大結局，馬國明同胡定欣終於肯企定定合照，馬國明仲話上次唔係避胡定欣，佢解釋：「寃枉呀，上次拍劇，咁我答應咗請客就一定請，真係冇嘢o架。」胡定欣對住馬國明話：「係啦，你快啲澄清，上次冇到，我係咁俾人問呀。」佢兩個都強調只係朋友，至於分手傳聞，馬國明話：「朋友又點分開呀？」

洪爺激動耍冧

馬國明仲話唔覺胡定欣有公主病，佢話：「佢冇表現畀我睇喎，佢唔係雜誌寫咁貪慕虛榮，可能寫佢喺戲中角色。」胡定欣就話：「我係香港女仔，唔好咁形容香港女仔啦，咁係咪要我扮嘢呀？」話口未完胡定欣就挨落馬國明度扮嗲，兩個戀情真係似有還無咁。
至於鄭嘉穎早排喺無綫節目《今日VIP》度俾林子善（洪爺）爆佢踢鞋嘅舊事，搞到當堂黑面，前晚佢兩個猛話冇咁嘅事，林子善仲好大聲咁話：「我林子善家就同大哥道歉。」點知喺劇中演大哥嘅鄭嘉穎話冇做過唔使道歉，又話自己冇黑面，但係林子善依然越講越激動。