吳奇隆女友劉詩詩事業愛情兩得意，佢今日喺北京出席鞋店活動，同場仲有位型男，就係憑韓劇《聽見你的聲音》人氣急升嘅李鐘碩，兩人獲大會邀請齊齊睇騷，但現場就交談唔多。

李鍾碩話鐘意女仔著金屬系列嘅鞋，咁啱劉詩詩今日雙腳就著咗對「金縷鞋」，佢就大讚劉詩詩有時裝觸覺。劉詩詩話：「工作關係時常需要穿高跟鞋，但現實生活，我愛穿平底鞋。」有記者問男友吳奇隆算係高踭鞋定係平底鞋？劉詩詩顯得有啲忟憎話：「不要拿鞋子比喻吳奇隆。」

劉詩詩喺新年時拜會過吳奇隆雙親，雖然未有提及婚事，但佢覺得男友父母都係慈祥長輩。至於首次到北京嘅李鍾碩被現場粉絲嘅熱情嚇倒，佢話：「我不知道我在這裏這麼受歡迎！」不過佢唔知天氣著多咗衫，一邊睇騷一邊嫌熱，要助手幫佢撥涼。