第二屆amfAR慈善晚會今日舉行，吸引城中名人及藝人聚集，呂良偉、楊小娟、何超儀、何超蓮、何猷啟、AmandaS、邢嘉倩及王敏德兩公婆等均有出席。

超盈就率胞弟猷君及細妹超欣到場，弟妹噚日先返到香港，問到猷君點解唔帶埋女朋友Kimmy嚟，超盈代答：「佢都唔喺香港，下次喇!下次喇!」

問到超盈近期係唔係有啲心廣體胖，佢就尷尬講：「可能係!係件衫!」講到佢嘅身材豐滿咗，超盈續道：「多謝!多謝!」

超盈又指自己近期好忙，冇時間做運動，因為第一年入咗呢個會，佢話：「媽咪(四太)同屋企人一陣都會嚟，即係o依家嘅工作之中，做呢個會唔止呢個慈善活動。」超盈更指公司今次捐出5件拍賣品，有信心籌到一個幾好嘅善款。

另外，有咗BB六個月嘅邢嘉倩，著咗件紅火色開胸裝現身，不過就唔肯講今胎係陀仔定女，問佢為BB準備咗日常用品未?佢就話：「都係用朋友嗰啲，都係用舊嘅，支持環保。」

佢話目前陀B冇覺得身體不適，只係成日會出汗，咁係唔係生完先結婚，邢嘉倩直言：「唔係!o依家係廿一世紀，唔使結都得，目前已為人父母。」邢嘉倩稱已為BB諗好男、女嘅名，睇吓之後點，邢嘉倩又指，繼母林青霞都會買嘢畀BB，不過目前仲係太早。