上星期，立法會議員一致支持通過《種族歧視條例》。議員覺得，立法禁止市民講「鬼佬」、「阿差」、「賓賓」等稱呼，就係體現「種族和諧」。對於咁反智嘅思維，一向反對民粹嘅林夕，自然欲罷不能、有話要講……

林：（《歧視法》）立意雖善，但我哋都係要計番個執行可能性，同執行嘅成本。（推動《歧視法》）公民黨最落力，雖然我唔能夠從懷疑論，就指從此會增加各行業嘅訴訟（成本）……

林：最大問題係，公義始終唔係掛喺口上邊嘅。尊唔尊重人，有冇歧視，其實係講個心嘅。譬如我有一套電影，講一個印巴籍人士同另一個親愛的「賓賓」談情，𠵱家（《歧視法》）話，如果當事人覺得冇冒犯就冇問題，但如果將來（和有關演員）反咗面，佢就可以指我當時嘅「語氣」其實係「冒犯性」，但語氣呢樣嘢又可以點判斷？

林：其實尊重其他種族係一種公民教育，應該由每個人嘅教育做起，由學校去做起……（尊重抑或歧視），係擺喺個心嗰度，就算𠵱家社會「好文明」，叫工人、傭人做「家務助理」，但最重要係，你心入邊係咪真係睇得起人？你畀佢嗰間工人房，係咪一樣細到好似難民營帳篷咁？你可以好政治正確咁，稱呼對方為「印巴籍嘅gentleman」，但同時個心入邊諗：「你唔好同我個女拍拖呀，阿差！」試問咁又有乜嘢意思？

林：你（政客）以為香港社會不斷走向新加坡化，不斷立法、立法、再立法，就能夠人與人之間，和平和諧，眾生平等？點解個社會會變成咁？