【中環】陳奐仁（Hanjin）近排有電影《溝女不離3兄弟》上畫，現實生活，已為人夫嘅佢同老婆Prima其實好恩愛。

滿載而歸

Hanjin同佢老婆前晚就拍拖去中環出席一個派對，兩公婆玩到凌晨先返屋企，行路途中仲情不自禁連咀兩次，sweet到爆。
Hanjin前年被爆秘婚多年，佢馬上坦白承認，老婆不時貼心傍實Hanjin做嘢，前晚8點幾，佢哋就離開中環寓所，拍拖去朋友嘅P，Hanjin同老婆Prima身高相若，佢哋十指緊扣出街，背影好襯吓，拖手拖到咁上下，Hanjin同Prima改為互相攬腰，黐埋變咗連體嬰，佢哋沿路行咗去中環一幢大廈，上樓參加朋友私人派對，記者同時又撞到黃佩霞，估計佢哋都係主人家老友。

Hanjin夫婦難得夜蒲，佢哋玩到噚日凌晨1點先走，離開時，Hanjin頸上有螢光圈，手上多咗啲禮物，Prima就拎住一個毛公仔，相信係派對回禮禮物。派對狂歡完，佢哋心情大靚，行路返歸時，兩公婆經過熱鬧蘭桂坊，懶理途人眼光，情到濃時，Hanjin同Prima嘴對嘴兩次，keep住熱情如火嘅心情返屋企。
採訪：梁繼光、畢紹基
攝影：朱志聰、羅德光

逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好多時裝靚嘢睇！