23歲昆凌上月8號，為老公周杰倫(周董)生咗第二胎，迎嚟細仔小小周，啱啱坐完月出關嘅昆凌，呢兩日就同老公周董，俾網民見到同遊日本。

以往熱愛遊日本嘅周董，周不時俾人發現佢喺東京嘅遊蹤。佢同啱啱生完嘅昆凌，前幾日就俾網民發現同遊日本，網民先喺東京羽田機場見到佢哋，雖然兩公婆黑衫look包到冚，但周董身穿繡著「JAY CHOU」嘅外套，呢下不經意嘅「張揚」，好難唔俾網民發現囉。

呢幾日陸續有粉絲發現佢哋喺東京高島屋出現，兩公婆仲主力逛童裝。喺其中一張相就見到周董同昆凌同樣着住黑色背心、短褲。身材四肢纖瘦嘅昆凌，完全睇唔出啱啱生完，反而隔籬嘅周董，手臂仲睇落有啲啲肉感。