本港今日新增2宗初步確診個案，二人為夫妻，同住深水埗元州邨元樂樓，暫未知感染源頭。記者今午到元州邨一帶視察，邨內不少長者都無佩戴口罩，涉事大廈未見有通告通知居民。有元樂樓住戶說，因買不到口罩，同一個口罩已戴了10日，「（疫症）嚟都無得驚」；亦有住戶說，未見有人到場大清潔消毒。

《蘋果》今午到兩名初步確診個案所住的元州邨視察，有不少長者在屋邨內乘涼散步，沒有佩戴口罩或將口罩拉低的人隨處可見，也見到有大叔隨地吐痰，亦有人戴上CSi口罩。屋邨內多個公園內設施已關閉，但仍有長者使用康健設施。元州邨長期有大量鴿子聚集，鳥糞處處。

兩名患者所住的元樂樓，未見保安張貼通告告知有住戶初步確診。有同座住戶看完新聞後落樓向保安了解情況。大廈門外有一個專供棄置口罩的垃圾桶，保安傍晚6時許例行清潔大堂，暫未見衞生署人員到場。

居民感染而且源頭未明，意味有社區爆發風險，以輪椅代步的元樂樓住戶陳女士說，「（疫情）嚟你都無辦法啦，有咩擔唔擔心㗎啫」。她說，因要買菜，無可避免要外出，惟家中口罩不足，「我呢個都戴咗10日。（點清潔？）無清潔㗎，晾起佢囉唔係點？啲口罩咁貴點買得起，唔使食飯咩？」即使有人派口罩，也因行動不便，「去到都尾水」。她指，區議員和政府應向住戶派發消毒藥水和口罩等用品，「政府（抗疫工作）你話好唔好啊？有口難言啊」。

另一元樂樓住戶陳先生看完新聞後，專程落樓向管理處查詢，上午至今未見到有衞生署人員來大消毒。被問到會否擔心疫情，他說擔心都無辦法，「惟有自己小心啲」，會減少外出。戴上CSi口罩的他說，是任職食環署的妻子早幾年「積積埋埋」儲落的存貨，「唔係新嗰啲」，加上兒子有網購口罩，家中口罩尚算足夠。他認為屋邨內衞生情況一般，不時見到街坊不戴口罩。至於政府的防疫工作，他則說，「政府做成點唔關我哋事，街坊中招佢周圍走都幫你唔到」。

到元樂樓探望父親的黃女士說，不擔心疫情，雖然之前有為父親買口罩等防疫用品，但因父親年邁，又擔心口罩不足，平日較少出門。她說，暫不打算將父親接走，認為現時已出現社區爆發，難以避免中招，「其實你出街都唔知隔離左右有無人有（武漢肺炎），唔驚得咁多」。被問到政府防疫工作表現，她指，「一定唔係話咁好，但都叫有做嘢嘅」。

-----------------------------
【未敢忘記】03年沙士重溫
立即按此
-----------------------------
無懼警暴 學懂自救
《抗暴之戰●法例須知》讀果 上架
-----------------------------

《果GYM》隨身播 　健身壹App過！

一按即玩