獲提名今屆金像獎最佳新演員嘅梁雍婷(Rachel) 噚晚去到九龍塘出席電影《媽寶兄弟》首映，同場仲有賈思樂同廖安麗。仲有唔夠三個星期就到金像獎頒獎禮，Rachel表示心情好緊張又好期待，佢話：「第一次出席咁大場面，已經準備好當日要着嘅衫同鞋，因為自己唔夠高，淨係對高踭鞋都五、六吋，好驚到時會仆親。」

講到自己嘅勝算，Rachel就話：「我自己真係冇諗咁多，好老土咁講句有得提名已經贏咗，而且自己真係好欣賞凌文龍嘅演出，我都希望佢會攞到。」獲得提名後有冇收到更多演出邀請？佢話：「的確有嘅，o依家都有啲劇本同廣告傾緊。」又透露稍後會演出港台有關消防員嘅劇，仲要首次剪短頭髮，佢話：「劇入面我要飾演救護員，所以要剪短頭髮，我自己好開心期待，完全冇唔捨得。」

精選娛聞，喺晒《娛果》
http://fb.com/appledailyent