韓國7人男團MyTeen今年7月先正式喺韓國出道，不過出道前已經現身過有唔少活動，今年1月更曾經襲港辦迷你見面會，累積人氣，而7子將於聽晚孖住同門師姊、前女團2NE1成員敏智，喺荃灣大會堂舉行開騷。不過今日MyTeen就率先現身D．PARK愉景新城，舉行擊掌及簽名會，同港迷近距離接觸。

對於今次係第二次襲港，MyTeen表示：「第一次訪港係出道前，今次見到粉絲依然咁支持我哋，好多謝大家。」而年紀最細嘅漢瑟今次係首次隨團來港，佢就指感受到粉絲嘅熱情覺得好開心，會繼續努力。隊長泰彬就表示來港想食芒果冰、去旺角行街：「因為上次來港唔夠時間去，所以今次好想再去。」其他成員亦指想點心及喺酒店游水。

提到聽晚騷上與前輩敏智同台，MyTeen都表示好榮幸，希望演出時冇失誤，又大爆聽晚港騷除咗唱主打歌，亦會有其他side track。MyTeen笑言有訓練過廣東話，仲即席講「我愛你哋」向港迷示愛，及後MyTeen又賣口乖「所有前輩組合都好欣賞」，不過就最鍾意EXO及防彈少年團(BTS)，目前仲係新人嘅MyTeen就表示想上綜藝節目《認識的哥哥》。

對於未來有咩挑戰，MyTeen希望今年能出席《MAMA音樂頒獎禮》及今年內再訪港，被問到組合嘅優勝地方，MyTeen指：「我哋好活潑、有活力，可以同粉絲好親近。」泰彬亦大讚成員都好好、好聽話。及後MyTeen勁歌熱舞《Amazing》及《Take it out》兩首歌曲，引得粉絲尖叫聲不斷，表演後七子就為幸運粉絲擊掌及簽名。