發動過六七暴動嘅工聯會，近日又借強國反日暴動挑起民族情緒，當選立法會議員嘅麥美娟噚日喺電台亂噏，叫政府向日本發出黑色旅遊警示。學者話佢邏輯有問題，網民亦大罵：「儍的嗎？有乜?地方危險得過大陸？」
喺臉書貼咗同多啦A夢合照嘅學者沈旭暉話，黑色旅遊警示係外國地區可能出現影響人身安全嘅風險，級別係「嚴重威脅」，除非工聯會掌握到機密資訊，知道日本就快有事發生，否則係邏輯有問題，或者有人抽水。

「旅遊警示唔係政治工具」

東瀛遊執行董事禤國全話去日本嘅港客冇減少，明寸麥議員：「旅遊警示唔係政治工具，佢根本用錯嘢，到今日為止，都冇中國人或者香港人喺日本出事，睇唔到當地有乜危險。內地喺國慶前取消咗過萬個去日本嘅機位，係中國旅遊局唔准辦日本團，搞到啲客想去都冇得去。」
剛當選旅遊界立法會議員嘅姚思榮都話睇唔到有乜理由建議發黑色旅遊警示，至於支唔支持，就要諮詢?業界意見。保安局發言人表示，國家外交部喺本周一已提醒喺日本嘅中國公民注意人身安全，港府會密切留意事態發展。
理性嘅香港人梗係冇俾工聯會煽動，有網民叫麥美娟快啲返大陸。有人建議佢試吓揸住日本貨大搖大擺入深圳，再拎住國貨去東京招搖過市，睇吓佢會喺邊度俾人打。