楊張新悅、倪晨曦、劉思希等今晚喺中環出席髮型屋開幕活動，着住條工人褲嘅楊張新悅好似瘦咗，佢話﹕「平時都係咁，做媽咪後會有水桶腰，但平時手腳都係咁瘦。」佢話見徐濠縈做咗媽咪級都咁瘦，平時自己會做瑜伽，但就唔鍾意曬太陽，佢話﹕「老公11月參加毅行者，有時會帶埋小朋友陪佢行，但會揀山路，因為爬山試過遇青竹蛇，行馬騮山又有好多馬騮，都幾危險。」問有冇遇見過周潤發？佢話﹕「冇喎，撞到大學教授。」佢透露計劃暑期去歐洲或英國旅行﹕「脫歐後英磅平咗好多，鍾意去歐洲，好似特別有氣質。」

倪晨曦着咗件透視裝，佢話16歲試過自己幫自己剪頭髮，但太樣衰，最後要戴帽出街。佢話未試過同髮型師拍拖，咁o依家有冇男友？佢o依o依哦哦一輪，話﹕「嫁得就通知大家。」佢話唔係想保住女神形象，只係男友係圈外人，佢話﹕「呢個年代冇乜影响，只係唔想講太多私人嘢，出街都唔會太親熱，最多有時拖手。」係咪結婚對象？佢話﹕「考慮中。(男友己求婚？)冇，唔急，人生去到某個階段自然發生。」