借西九，做特首？
曾蔭權的西九地產項目假使成功單一招標，西九地王落入一兩個大財團手上，其他地產商家唔係死蛇爛鱔，西九既然冇嘗到甜頭，怎可能出錢出力扶正反骨仔。田少的陰謀論難以成立。但他含沙射影指曾蔭權無可能為退休後加入財團打工鋪路，卻是話中有話。空穴來風，傳媒狗仔爆料隊有排忙了。
很少得罪官場朋友的田少，突然出招鋤權哥，論界指可能是為了他的死黨唐少拔去眼中釘。大家都係少爺仔出身，同屬一系，理所當然幫自己友。

得西九，得天下；借西九，做特首。西九已經從地產項目升級成為政治議題。紙包不住火，各方豪傑盯實西九套餐點菜開飯，西九的天幕設計，等於特首辦公室揀室內裝修，市民雖然沒有話事權，但總可以評頭品足一番。政府和各界有心人不妨大大方方，在西九模型旁邊，多放一個自己的治港施政報告，等市民有個初步概念，知道接老董手的人選，「隻手遮天」的能力有幾強。這個人肉天幕，2007年就要交吉，及早有辦睇的話，有乜甩漏，還來得及補鑊。
傳聞對西九「起痰」的人選，暫時離不開官商兩瓣。西九既然用文化裝身，應該好好醜醜拉攏幾個跨文娛兩界的紅人，做媒落叠。試諗吓曾蔭權的對手是周星馳，唐英年的勁敵是成龍，范太出選的話，家燕姐和白姐姐也參一腿，三大阿姐咁高咁大絕對不是陪跑。西九上馬，選舉工程去馬，特區沙塵滾滾，但願有一隻上帝之手幫市民遮住鼻哥窿。