祖雲達斯前日對布雷西亞前,搞咗個創會109年慶典,似做騷多個踢波,未開波都好似贏梗嗰隻。果然,布雷西亞食完人蛋糕就要吞雙蛋。祖記8連勝後已升上意乙聯賽榜三甲,提早達成聖誕節前要上三甲嘅目標,準備定升班都冇衰。
類似大場面,喺意乙比賽認真少見。除咗兩個近代10號仔巴治奧、施丹冇畀面出席外,基本上祖記歷代名宿,包括柏天尼都到賀,成棚人切蛋糕,連布雷西亞班主都食埋一份,開開心心開完party至吹雞開波。我求驗客早幾日至講過,啱啱為球會射入200球嘅廸比亞路,入波將會長入長有,話口未完,佢今場開波6分鐘即刻省入一球,然後再傳球波整鬼對方球員擺個烏龍贏2:0。