連詩雅（Shiga）今日喺觀塘出席ViuTV嘅小朋友平衡車比賽真人騷《Baby Rider》拍攝活動。

連詩雅噚日有份去西九舉行嘅戶外電子音樂節「Road To Ultra」，Shiga話自己天黑就走，因為太熱。至於現場有人疑似吸毒引致1死3命危，佢話：「我知道有新聞，但冇睇到內容。我冇留意有冇人吸毒，不過場內有賣酒，我以為飲醉，大家聽到啲音樂都好興奮。我自己都有朋友暈咗，不過係因為太熱又焗，休息咗陣都冇事。」

喺活動上，Shiga擔任其中一組小朋友嘅星級經理人，佢話：「我有份幫佢整車、同佢地玩、訓練。我好鍾意小朋友，不過一開始都要送下糖同貼紙，我地都OK friend㗎。」問佢打算幾時生返個BB？Shiga話要完成手頭嘅工作先：「我好早就好想生，不過唔係話想就生得，女artist又要休息，復原期又長，起碼都要做哂手頭上嘅嘢先。男artist唔使休息嘛，如果我係男人，一早就生咗。」

問佢係咪即係有男朋友啦？佢又耍太極話：「正常社交啫，唔係一黎就諗呢啲（生BB）。」記者指佢懷孕嘅時候，徐浩唔使休息，可以照搵錢養家？Shiga笑謂：「唔關事，係我想做嘢先呀嘛。」