譚小環9月6日就45歲牛一，佢自12年淡出幕前後轉型，仲喺14年銅鑼灣創業開渣哥賣魚蛋，舊年仲開埋分店，而兩間舖仲先後回本，而小環同老公蔡強榮（Eric）同啲股東就定下最新目標，就係要喺18區開晒分店。據知小環同老公已睇中喺旺角同鰂魚涌開分店，近日已開始籌備裝修事情，希望可以喺9月內連開兩店。

噚日朝早11點幾，《蘋果》就發現小環孖老公Eric去咗鰂魚涌海光街為新店視察，準備該鋪嘅裝修事宜，據知兩間新舖面積一樣都係約400呎。小環接受《蘋果》訪問話：「鰂魚涌店因為鋪位裏邊乜都冇，重新裝修，費用較貴，預計要150萬。」

小環又話，由於尖東店經營一年就回本，所以決定多開幾間，而旺角店就首次以特許經營方式開設，小環話：「揀咗三位後生年青人，我哋主要為加盟者提供營運服務同食材，加盟者要畀約七位數字投資落嚟，目標希望一年回本，我哋對旺角區好有信心。」據知加盟費約100萬，小環仲話會努力分身去巡鋪，又話可以提供更多就業機會。

問到小環係咪準備將公司上巿？老公Eric就話：「梗係想，但有排都未得，o依家十劃未有一撇。」Eric會點同老婆慶祝生日同結婚十周年？佢話：「我哋最多同朋友食吓飯，低調咁過。」送乜大禮孝敬小環？Eric好直接話：「多數現金啦。」佢仲話生日同結婚周年係分兩次送，咁每封大利是約幾錢？佢就笑住話：「幾多錢就無謂講，但有番咁上下重手，頗為可觀啦！」