去年奶價低處未算低,當時有業內朋友曾說:當你見到內地傳媒鋪天蓋地咁報道農戶倒奶殺牛時,應該就差唔多見底了。結果俾佢開口中。隨着今年新西蘭恆天然宣佈減產,奶粉拍賣價連續第四次回升,上游奶股近日全線大翻身,平均累升一成。
不過,芬佬普遍認為,奶股今次見底,只是一個六至十二個月的「交易」(trade),炒一轉即逝;中長期是否「轉view」、值得大手吸納?他們會答你:唔似。
聞說外國投資者對內地養牛股,有一個有趣的睇法:綜觀全球咁多市場,從來只有做下游產品會發達,如雀巢、達能,你幾時有見過有做牧場的會發達?就算可以做到好似恆天然咁,全球最大規模,PE都只得低雙位數,盈利率亦不會如內地同業咁,EBITDA有成20%、30%咁誇張。
上游行業經營風險高,自然是限制估值的一個重要因素。但投資者更關注的是,養牛本身是一門需要大量資本投入的生意,經營成本唔平,規模效益亦唔明顯。故此,養牛的回報率屬長期偏低,甚至把現金流拉長來計,持續都只會出現淨流出的情況。到底內地高利潤的養牛業,係咪真係有其獨特因素,可以持續下去?仍有待時間去驗證。
海迪