香港 舊年經歷咁多事，但係滙控香港區經調整稅前利潤不跌反升5%。以香港嘅滙豐僱員大約3萬人計，佔全球僱員唔夠15%，但貢獻咗整個集團嘅54.5%稅前利潤！其實呢間銀行喺香港今時今日已經唔係做得叻，原來喺海外表現更加遠遠不濟。其實有一間公司喺香港呢個地方食老本，食到即將滅亡，呢個最好嘅反面教材非TVB莫屬。

裁員最多3.5萬人，競爭力會提升？至少喺收入層面，一定唔會。滙控選擇大裁員，估計香港呢個賺錢地嘅炒人比例會相對低，變相令滙控更近乎all in香港。裁員等等嘅精簡架構措施，喺2020年至2021年產生72億美金嘅重組成本，如意算盤係2022年或打後每年慳返45億美元經調整成本，左扣右扣，即係大概2023年內，重組計劃先開始打和，2024年打後先每年慳45億美金。而慳到嘅錢，根據滙控嘅講法，係補充資本再投資，另外有1,000億美金嘅風險加權資產沽出再投資，偏偏佢哋往績差勁，有形資產回報率只得8.4%。做一輪大龍鳳，睇唔到會改變命運，仲要個鴻圖大計實行幾年，曲線話畀大家聽，未來幾年呢間銀行會繼續唔長進落去。

最愚不可及嘅係，滙控明明越嚟越all in喺香港，偏偏喺舊年嘅社會事件裏面，星火事件同過半 香港人 過唔去。前幾年嘅slogan「環球網絡、地方智慧」，而家連自己地頭嘅智慧都冇埋，越睇，就越有TVB嘅影子。

前排有朋友問小弟關於高息股嘅選擇，小弟將滙控排喺最尾，因為，股息率7厘？睇個勢都keep唔住。其實小弟都希望滙豐會好，始終掌握香港3萬打工仔命運，希望唔會步TVB後塵吧。

晉佳

https://www.facebook.com/advanceguy1