9歲嘅小巨肺Celine(譚芷昀)，由《全英一叮》唱到《全美一叮》，專挑戰高難度作品。「巨肺」一來是天生，二來是拜歌手兼歌唱導師兼老竇譚順生（Dr.Steve）訓練。聲稱從不嚴訓女兒的譚生，視唱歌為親子時間，見囡囡遺傳了其唱歌天份(3歲就唱歌仲識震音)，即予以栽培，教材都係DIVA級數，連英文名都叫Celine，可見一斑。

Celine揚威國際之前，一直係香港兒童歌唱比賽常勝將軍，更北望大陸，曾參加《中國新聲代》唱《You Raise Me Up》，一鳴驚人，就連快將離任的行政長官梁振英，2015年仲未學玩facebook，但嗰陣已經喺YouTube見過Celine嘅片段，覺得佢兩文三語掂，就欽點佢出席喺會展舉行嘅中華人民共和國66周年國慶酒會，以英語、廣東話和普通話獻唱《You Raise Me Up》、《真的愛妳》同《我的祖國》3首歌。

譚爸爸最初都唔知係特首邀請，只係收到政府嘅請柬，酒會當日先至知真相：「特首講話係佢邀請，話自己喺個網上見到，特首自己點咗呢3首歌」，梁振英又叫他要「好好栽培」譚芷昀。