噚日,報紙頭版刊登咗一篇聞者傷心,見者流淚嘅報道。話說,一位未成年少女,喺金沙度玩老虎機,「贏咗」74萬,不過可惜,由於贏咗老虎機要記名登記,佢未夠秤,職員知道之後,冇賠到畀佢。
除咗嗰個女仔欲哭無淚,因為人生冇幾多個機會可以中到大額老虎機獎,咁早就用咗個quota,我都幾戥佢唔抵,但係最唔開心嘅,一定係金沙主席Adelson。
𠵱家開賭場,唔係驚你賭錢贏到開巷兼肥到襪都着唔到,最驚嘅,係你唔嚟賭,而有咩嘢誘因令到賭客唔去賭,就係賭場傳出贏錢冇得賠嘅消息,賭仔心態,有機會贏,風險幾大都會去博,但係俾人知道冇得賠,輸梗,邊個肯嚟?
大家可能會問:「點解賭場唔驚人大包大包錢咁贏走?」賭場係一盤靠機會率嚟贏錢嘅生意,雖然喺賭枱上面,好明顯係不公平競爭,賭場贏嘅機會係大賭仔好多,不過就算係咁,如果好少人去賭,求其俾人贏咗一鋪甘嘅,賭場都有機會會輸。如果又要做生意,又要必贏,方法唔係唔賠錢趕客,而係增加賭客嘅數量,可能中間會有偏差,令一啲好命嘅賭客贏到錢,但係大量嘅賭客機會率都係落咗喺輸錢嗰邊,人越多,賭場想輸都幾難。