亞洲電視「山窮水盡」，繼續拖糧，員工仲醞釀罷工罷播，一班前/現任亞視藝員應《蘋果》娛樂之邀請，包括亞視台柱包括夏春秋(冬叔)、鮑起靜(鮑姐)、吳浣儀、斑斑、劉錫賢、黎燕珊、黃麗梅、張立基、袁潔儀、寶珮如、蔡國威(威仔)，以及前高層葉家寶，一齊開開心心大團年，祝大家快啲有糧出！

不過講到尾都要講現實出糧問題，黃麗梅就覺得老板股東要出嚟交待，佢話:「有啲兩個月都冇出糧，喺經濟上好難應付到，我覺得最重要出咗糧比員工先，反而節目播唔播都唔重要。」亞視一路吊鹽水，係咪覺得不如早執笠好過？麗梅就話:「我覺得應該有個交待，如果有心有能力去繼續做呢間公司就要比啲誠意比啲行動出嚟，唔好成日有個假象比啲員工，比個希望佢，到時失望好慘架嘛，佢哋已經白白做咗兩個月，雷鋒唔係好多個o架咋，國內叫雷鋒即係白做咁解，佢哋又唔可以轉得工，停薪留職，喺出邊搵住啲嘢做維持生活，要養屋企養細路，我相信佢哋都會搏命搵錢，發揮香港人嘅精神，但佢哋又唔可以出去做其他嘢，要堅守自己崗位，對呢班支持亞視嘅員工，堅守到最後一刻，到而家都仲係工作，天寒地凍都重返工，我真係好佩服，比着我自己一早選擇離開。」

鮑姐話好戥班冇糧出嘅員工慘，對於亞視分分鐘提早執笠，鮑姐話:「咁都冇辦法，個老板一毫字都唔肯攞出嚟經營，尤得佢早啲啦，唔好害咗大家呀，政府都唔放過佢呀，本來應該到4月架麻，一個結束應該好好哋結束，一個光榮結束。」