【李八方online】葉劉倡派1萬蚊消費券 唔擔心益咗「黃店」
蘋果日報 2019/12/18 14:37
葉劉淑儀財政預算案薪俸稅李八方ONLINE容海恩消費券產後母親
葉劉話唔係「派錢」，主要都係扶助受反修例運動影響嘅行業，建議派嘅1萬蚊消費券可分為餐飲、零售同旅遊三方面。
乜用錢真係可以收買人心咩？繼自由黨後，喺區議會選舉輸到一席都冇嘅新民黨，唔接受特首林鄭月娥就拖累區選敗陣道歉，但身為行會成員嘅黨主席葉劉淑儀未同政府割席，今日帶隊見財政司司長陳茂波，就明年出爐嘅《財政預算案》提出唔少「放水」建議，包括向18歲或以上永久居民派發1萬元消費券，同時又建議向產後母親派發一筆過2萬元資助、寬免薪俸稅上限4萬元、推出約3億元資助旅遊業等等，覺得措施可以喺短期起到「救市」作用喎。
腹大便便嘅副主席容海恩預計下月生產，相信向產後母親派2萬元資助都未必適用於佢，而葉劉就堅持，佢哋只係建議仿效日本同台灣等地推出消費券，唔係「派錢」，主要都係扶助受反修例運動影響嘅行業，建議派嘅1萬蚊消費券可分為餐飲、零售同旅遊三方面。
葉劉引述陳茂波對相關建議並唔抗拒，但就擔心執行問題，有記者問佢擔唔擔心消費券最終只會令「黃色經濟圈」嘅店舖受惠？葉劉直言「唔擔心」：「唔使擔心係『藍店』定『黃店』，適者生存，表現好嘅經濟體就可以生存」，指市民長遠而言都係幫襯好味道嘅食店，唔會長期區分藍店同黃店喎。