要喺球員轉會市場上獲得好球員，錢當然係主要因素，不過，要做到好似皇家馬德里咁，有錢又有面，搵埋施丹同朗拿度拍摩連奴成為「星級團隊」，真係冇咩其他球會可以做到。所以摩帥剃到阿巴莫域治眼眉，有幾奇？
講到皇馬，一直以嚟都羅致過唔少超級球星，皆因金錢喺佢哋嚟講唔係問題，加上球會聲譽，結果曾經吸引到費高、朗拿度、卡路士等頂尖球星加盟。到咗今時今日，亦有C朗、卡卡及奧斯爾等新一代球星，但對於會長佩雷斯嚟講，當然唔會滿足現狀，所以搵摩連奴教波之餘，邀請埋前法國球王施丹做體育總監，最近又有朗拿度幫手發掘巴西年輕球員，呢個「星級鐵三角」，連西甲宿敵巴塞隆拿同英超班霸曼聯都要行埋一邊。

開價5億豪過車仔

至於星級團隊今夏最大單工作，肯定係向山度士新星尼馬埋手，呢位巴西超新星過去半年都獲得唔少球會斟介，包括摩帥曾經執教嘅車路士對佢虎視眈眈，而車仔班主阿巴莫域治更極之希望收購旗下。不過，舊部屬摩帥代表皇馬出手爭尼馬，不單止出價達到4,000萬鎊（約5億港元），高過車仔，而且仲有施丹及尼馬同鄉「大哨」幫手游說，呢啲超級球星嘅人情牌，車仔真係冇得揮。如果我求大俠係尼馬，咁有面子有一代球王「大哨」同施丹邀請過檔，咁你話會揀皇馬定車仔？
目前皇馬喺尼馬爭奪戰上，形勢稍稍佔先，若最終成事，相信只不過係呢個「星級團隊」工作嘅第一步，今後施丹同朗拿度分別負責發掘「歐洲系」同「南美系」新星，所打嘅人情牌，一定強過好多球會。
另外，摩帥搵新血同時，亦不忘一班舊將，雖然目前正唞暑，但佢就設計咗一份為期12日嘅「暑期功課」畀班球員，要佢哋自行游水、打網球同籃球保持體能，直至下月11日嘅開操日為止，目的係備戰季前對巴塞嘅西超盃。