「反送中」運動事發至今，冇問責官員下台、唔回應民間五大訴求嘅林鄭班子明顯想再起步，除咗想約見學生同年輕人﹙雖然食白果﹚，亦調整應對策略，開始搶攻輿論。好似星期日沙田「反送中」遊行結束後，因為警察突然衝入新城市鎮壓示威者，引發流血衝突，特首林鄭月娥翌日到大埔那打素醫院探望受傷警員，形容示威者係「暴徒」，結果《金融時報》日前一篇報道就話林鄭將示威者定性為「暴徒（rioters）」非常標誌性，可以俾警方用更嚴重嘅罪名檢控示威者，結果特首辦助理處長都要打真軍，親自投稿「闢謠」。

《金融時報》日前一篇報道話：「林鄭將示威者定性為暴徒非常標誌性，可以畀警方用更嚴重嘅罪名檢控示威者（characterisation of the protesters on Sunday as "rioters" is significant because it will allow police to pursue more serious charges against them）」。

呢篇報道似乎觸發咗特首辦嘅神經；特首辦助理處長（傳媒）姚繼卓周二（16）以真身投稿《金融時報》，以〈香港司法機構會公正地履行職責〉（Hong Kong's justice department will discharge its duties impartially）為題，反駁《金融時報》報道唔正確。文章話，特首同律政司過往已多次表明，執法機關調查違法行為後，由律政司根據證據、適用法律和檢控守則，去決定起訴與否，而有關決定是由律政司獨立作出，文中又強調，特首或任何人嘅任何描述或定性（characterisation）都唔會影響律政司根據《基本法》公正履行其起訴職責。

講真吖，上述論點都係無限loop，但八方相信政府自己都深知肚明，鄭若驊民望已跌至歷任官員新低，冇晒認受性，點會能夠令公眾相信，佢會作出公正決定？又咁講，助理處長撰文投稿都唔係首次，不過適逢此際，相信唔少人都會對內文更着意。

-----------------------------
民陣7.21遊行
日期：7月21日（星期日）
集合起步時間：下午3時
起點：銅鑼灣維園
終點：中環遮打道終審法院
-----------------------------
【每周送10萬】
升級壹會員獨家尊享，立即參加10萬火急大抽獎 !
*推廣生意的競賽牌照號碼：52302-9