謝安琪（Kay）同王君馨今日現身中環一個唇膏品牌活動，Kay搽上鮮艷紅唇，大講扮靚經：「自己唔係經常化妝，出活動鍾意鮮艷啲，化妝師讚我嘴形靚，鮮色以前接受唔到，o依家得，鮮艷顏色精神啲。」講到囡囡會唔會要求搽唇膏?Kay笑言囡囡得1歲，未有咁快，而講到老公張繼聰會唔會讚佢唇靚，佢笑言：「佢都讚賞嘅，佢好難唔讚賞，佢最初鍾意我時候我係箍緊牙，佢都估計到我嘴係一個重點。」

提到工作，Kay透露下月開始錄音，佢笑言：「Juno成日同我開會，一齊傾創作，預計今年之內會出碟，如果出唔到係Juno問題，瀨落佢度。」再問到會否今年開騷，Kay就話有唔少單位搵佢同Juno：「自己想年底發生，我都想睇Juno開騷，我都等緊，佢成日同我爭歌，例如有啲歌畀我，佢又話我夠歌，最終都係我爭贏。」

此外，王君馨一身輕露事業線吊帶服飾示人，她揚言婚後都要保持身形，問到佢係唔係怕老公睇厭，佢表示：「我老公都幾靚仔，所以我成日都問佢喺公司會唔會被女仔撩?佢話反而婚後少咗，其實自己日日對住老公，要着靚啲，打扮靚啲，佢日日都健身，我都想夏天操多啲肌肉，pat pat翹啲，着衫都靚啲。」對於好姊妹苟芸慧今年出嫁，佢話：「應承咗做姊妹，應該籌備緊，佢未update，未知道幾時，仲知我哋班人妻黨已畀咗期，未知幾時。」問到邊個做伴娘，佢就補充：「唔知，我o個時結咗婚，o個時嘉欣結咗婚都可以做伴娘。」

精選娛聞，喺晒《娛果》
http://fb.com/appledailyent