今個月好戲連場，先有今日上映嘅《美國隊長2》，下個星期就會有萬眾期待嘅《那夜凌晨，我坐上了旺角開往大埔的紅VAN》，《紅VAN》講述一部小巴過咗隧道之後，全香港冇晒人，個故事都幾科幻0架，到5月就會有《蜘蛛俠2：決戰電魔》。

不過近日網上就有條片流出，係同蜘蛛俠有關嘅，條片先係一個蜘蛛俠出場，四圍飛，飛到一個地方，蜘蛛俠望一望塊鏡，見到嘅唔係一個正常嘅蜘蛛俠，而係一個迷你版嘅蜘蛛俠，如果喺戲院睇到呢一幕的話，相信個迷你版蜘蛛俠嘅可愛程度，足以令到唔少人尖叫。

其間大人蜘蛛俠就好疑惑咁望住迷你蜘蛛俠，之後仲做出一啲有趣動作，好似用蜘蛛絲織咗條橋出嚟，又用蜘蛛絲跳繩，真係好可愛。

其實呢個係一個礦泉水廣告，並非戲中會有呢一幕，但條片就拍得好細膩，加上迷你蜘蛛俠又咁可愛，條片出咗一﹑兩日，已經吸引有好多網民瀏覽，確係勁﹗