打波啫，唔洗冒住生命危險嚟打嘅。嚟到里約熱內盧參賽，唔止有寨卡、槍擊、小偷呢啲威脅，隨時仲會有野生動物出現喺你隔離！

今屆奧運嘅高爾夫球賽事仲未開始，選手把握機會到賽場練習，點知見到蛇又見到鱷魚，真係嚇死人！

有人喺賽場到見到一條足足八呎長嘅蟒蛇，又有人見到紅、黃、黑色嘅銀環蛇，仲有比老鼠大20倍嘅水豚，唔夠？仲有鱷魚！真係講出嚟都已經夠晒得人驚，啲選手見到又會點呢？

喺今年英國高爾夫球公開賽贏咗嘅瑞典選手史坦臣（Henrik Stenson）去完練習之後就講笑咁話︰「你有冇被咬呀？」雖然佢只係講笑，但係香港時間11號就會打男子第一回合嘅賽事，如果到時對選手構成危險就真係大件事喇！