「大小姐」林淑敏今年喺《萬千星輝頒獎典禮2018》中憑處境劇《愛·回家之開心速遞》第二次提名「最佳女配角」，今年終於得獎喇，去年落敗時，網民好戥佢唔抵，但林淑敏一啲唔介意，繼續默默努力。

林淑敏今晚着咗火紅色晚裝，造型高貴，當頒獎嘉賓陳山聰同張振朗讀出佢名字，林淑敏一臉意外，佢上台時，未講得獎感受已顯得有啲激動，佢一口氣多謝咗高層曾勵珍、樂易玲同余詠珊，林淑敏回想番7年前患乳癌，佢話：「7年前嗰場大病之後，我諗仲做得乜，樂小姐一個電話，叫我唔使擔心。」林淑敏憑《愛·回家》拎獎，佢亦多謝全劇台前幕後團隊。林淑敏最後不忘感謝老公：「多謝先生不斷支持。」

最受歡迎電視歌曲係劇集《跳躍生命線》插曲、由菊梓喬唱的《但願人長久》。菊梓喬上台領獎時話：「我一邊睇套劇，一邊聽歌，喊咗好多次。」

精選娛聞，喺晒《娛果》
http://fb.com/appledailyent