杜如風「踩blade」仆崩下巴 網民提供消瘀良方叮囑︰唔好食糯米
蘋果日報 2020/12/29 16:47
MT_娛樂杜如風踩blade滾軸溜冰散瘀
今年45歲的杜如風一向玩得，為人爽直不拘小節是眾所周知，而早前她接受《蘋果》訪問時，直認曾跟年輕自己8年的黃又南拍過拖，破解二人傳足13年緋聞的迷思。近日杜如風迷上roller sports，閒時約同三五知己去「踩blade」。不過昨日她在網上貼出一段受傷後拍的片，見到她下巴瘀黑了一片。
良方散瘀
杜如風昨晚在Instagram貼出一段影片，因為玩滾軸溜冰受傷，她開場白仍不忘講笑話自己去了整容「整咗個下巴」，之後才解釋傷勢話「大家睇下呢度腫咗，我唔係整容，睇真啲，我係『踩blade』時仆街。」到今朝稍為散瘀，她再貼一張下巴近照，見到瘀青一片，傷勢不算大嚴重。可幸是沒有表面傷痕，沒有破相的風險。杜如風話試過「用過冰敷，有碌過雞蛋，仲係瘀到咁！」，一呼百應好人即刻出現，短短幾個鐘已有不少人提供自家消瘀去腫方法，包括「早晚碌一次，加喜X妥」，又教她熱雞蛋碌時，入邊要加隻銀介指才有效，有人話「雲南白药膏布散瘀快」，當然亦有人叫她「快啲睇醫生」，同時提醒她「唔好食糯米」。有過來人就話瘀傷只是剛剛開始，明天會更瘀，不過散瘀後就會好返。杜如風今日接受《蘋果》訪問，講到受傷經過時，她說︰「當時練緊轉身，企唔穩成個向前扒落地下，下巴落地先，所以下巴腫咗突起一忽，而家仲係瘀緊黑色。好在塊面同啲牙冇事，就OK嘞。其實「踩blade」都預咗會跌，所以都冇乜嘢擔心會毀容。好多網民支持，非常之多謝，大家都好關心我會毀容，留咗好多message畀我。」其實早前她貼「踩blade」相時，已有網民講話「撻親阿嬸就大鑊了」，想不到一語成讖。
杜如風展示紅腫的下巴。（IG短片圖片）
低角度清楚見到下巴瘀青一遍。（IG圖片）
杜如風愛上滾軸流冰，早有網友已提她要小心。（IG圖片）
杜如風展示其中一款收藏的滾軸鞋。（IG圖片）
----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！