後望山墳:
話雖未見識到位處於第三座及第五座中間個焦點祖墳，但記者丁點兒都無失望，皆因由長實千挑萬選開放予傳媒的7座18樓A及B室的1+親組合，大廳及主人房露台一樣望到山墳，而且非一個個計，係一排排計，屋苑周圍都有祖先「庇蔭」。

超大窗台:
發展商開放的B室三房大單位，實用面積922方呎，主人套房窗台特大，記者現場度尺有近14呎長，夠瞓兩名記者有餘，中間仲夠位坐多個人，拍得住長實同系另一新樓，長沙灣的一號．西九龍。

超細廚房:
A室劏房廚房超細，空間只係夠企得一個人，呢樣都可以算係預料之中，但廚房內竟然沒有爐頭，得一邊有一個洗手盤，另一邊勉強叫夠位擺個熱水煲，煮公仔麵都唔得，只可用熱水沖杯麵，仲應不應該稱之為廚房呢?

劏房一眼睇哂:
一間僅得180方呎的劏房，記者只花六步已經行哂全間屋，單位一眼睇哂，而且大門一開，成個廁所門被遮左一大半，而且單位的窗台大細跟B室主單位都有得揮，夠一個人瞓有餘。

零私隱度:
嵐山位置隔涉就唔在講，交通唔方便就眾所周知，但隔涉就千祈唔好以為可以有返多少私隱度，皆因大單位與劏房戶，都可以清楚望到隔離座或隔離單位鄰居做緊咩，認真「親密」，私隱度近乎零。