當年今日

中環在線:花旗出事魯賓唔認賬 - 李華華

蘋果日報 2008/12/01 00:00


美國前財長、現任花旗銀行董事兼高級顧問魯賓,俾人話係花旗瀕臨倒閉嘅始作俑者,佢上個禮拜五接受《華爾街日報》訪問時,話唔應該入晒佢數,咁太唔公平。佢話花旗陷入困境,係因為金融體系不穩,唔係佢個人過失,而係銀行低估風險、樓市泡沫同評級機構濫發AAA,大家都有責任。簡單啲講,佢想話呢個係社會嘅錯,唔好入晒佢數。
舊年拒收花紅
不過,唔好以為魯賓冇腰骨噃,佢自99年起收花旗大概8.9億港銀薪金,仲未計股權,但佢舊年拒收花旗嘅花紅,認為應該花喺其他地方。
佢喺訪問中又承認,04至05年間曾參與董事會嘅決定,令到花旗大增高風險投資,但佢當時有警告投資者風險可能過高,又認為如果花旗嘅管理層恰當營運業務,銀行可以減少損失。呢句說話,好似喺香港嘅財金官員口中聽過呀呵!