恩斷義絕過後，可唔可以重新嚟過？據《ESPN》周四報道，紐約人原本同火箭、騎士積極談判，有意將陣中主力安東尼（Carmelo Anthony）交易出去，而呢兩隊亦係Melo僅有願意放棄「霸王條款」他投嘅球隊，皆因兩隊分別有好兄弟基斯保羅（Chris Paul）同勒邦占士（LeBron James）在陣，但紐約人經過連番磋商後仍然唔滿意報價，決定暫時退出談判。

紐約人另一考慮因素，係佢哋已經接近同53歲嘅帝王GM史葛佩利（Scott Perry）達成共識，將會聘用佢接替「禪師」積遜（Phil Jackson）離隊嘅空缺；話晒禪師近季在公在私都對Melo咄咄逼人，管理層希望呢位33歲10屆明星賽成員先同「新班子」見面，再商議下一步去向。不過，安東尼已經為紐約人仆心仆命效力6季，卻換來上季種種冷嘲熱諷，要說服佢回心轉意為「大蘋果」搏命，未必咁容易。