朋友問我會不會做人肉樣辦，鼓勵別人多生養。嚇到已經得番四分一條人命的我耍手擰頭。
自己都懷疑能力耐力，經常神經質覺得可能做錯了決定，又怎會煽動別人做高風險而無回報的長命債投資。
不過，事實上有很多人適合當父母，假使你是：
半夜四點九被寶寶吵醒，擾攘兩句鐘，到明晨八九點又給吵醒，能精神爽利迎戰新一天的超能力強人，不妨多生幾個。孩子有你的遺傳基因，做唔成超人都有機會做七項鐵人賽的冠軍。

整天陪寶寶睇「火車頭」VCD而仍然興致勃勃的老天真，童心未泯到這種地步，應該為香港出生率多做貢獻。
覺得電影無味，雜誌書報全部不及ＢＢ可愛可觀的恨仔狂，閒閒哋足不出戶240小時都得，有子萬事足，世界因此少很多八卦摩擦糾紛，人人安心在家湊仔，點會換車，交通意外都會少幾樁。空氣懸浮粒子即刻跌回安全水平。生態循環，造就利好閣下多生幾個的因素。
開車前咪飲，湊仔前就算飲大了，依然能照顧燙貼，不會疏忽孩子，誤把酒瓶當奶樽。這樣的高手，做父母可以咁high，當然生得過。生仔就當做開瓶好了，阿仔喊，就當是開瓶後的指定air步驟。