NBA明星賽逐漸逼近，聯盟喺周三公佈，騎士嘅路爾（Tyronn Lue）同馬刺嘅普波域治（Gregg Popovich、右），將分別出任東、西岸明星隊嘅教練；呢兩隊都喺同日嘅常規賽贏波，為己隊教練送上祝賀。
馬刺喺周三迎戰火箭嘅常規賽，馬刺雖有鄧肯（Tim Duncan）繼續因膝頭酸痛缺陣，不過阿域治（LaMarcus Aldridge）就回勇，拎到「雙雙」25分10籃板，助球隊以130:99大勝火箭。帶領馬刺攞到39勝7負，暫列西岸次名嘅普波域治，將出任西岸明星隊教練。每個人都會因唔同嘅原因而希望參加明星賽，普帥亦唔例外，佢表示：「能夠執教聯盟中最頂尖嘅球員，個感覺真係好正

路爾教三場即領明星隊

同日另一場，騎士喺主場憑路夫（Kevin Love）拎到「雙雙」21分11籃板，以115:93贏太陽，並以32勝12負嘅戰績暫列東岸榜首；喺上周五先成為騎士教練嘅路爾，亦喺同日獲選為東岸明星隊教練。不過佢𠵱家只係帶領騎士出戰咗三場常規賽，並以兩勝一負嘅戰績，就成為東岸明星隊教練，資歷真係淺咗啲。路爾知道自己可以參與明星賽，都不忘多謝為球隊爭勝嘅人：「騎士戰績咁好，都係前教練布拉特（David Blatt）、一班助理教練，以及球員嘅功勞。