由全度妍、劉智泰主演嘅tvN韓版《傲骨賢妻》自本月8號開播以來，收視就節節上升，噚晚播出第5集，平均收視有5.382%，喺首爾地區更高達6.831%，至於最高瞬間收視更突破7.1%。

而根據統計，劇集喺20歲至49歲年齡層嘅平均收視為2.8%，最高收視為3.4%；喺男性同女性嘅20至50歲收視年齡群亦都位居所有收費電視中篇節目嘅同時段收視冠軍。

大部份劇迷都被全度妍同劉智泰嘅演技所吸引，覺得佢哋兩位好戲之人鬥戲，擦出唔少火花。而全度妍事隔成11年之後再擔正拍劇，唔少影迷都好捧場，加上呢齣劇唔係以愛情為主題，所以吸引唔少成熟觀眾捧場。